هه‌روه‌ك گوتی: "ده‌ست له‌پایه‌ی سه‌رۆكی ئه‌نجوومه‌نی به‌ڕێوه‌بردنی مایكرۆسۆفت هه‌ڵده‌گرم و ته‌نیا وه‌ك سه‌رۆكی فه‌خری ئه‌نجوومه‌نی به‌ڕێوه‌بردن له‌گه‌ڵ كاركردنی رۆژێك له‌ حه‌فته‌ له‌ كۆمپانیاكه‌ ده‌مێنمه‌وه‌". له‌گه‌ڵ ئه‌وه‌ی مایكرۆسۆفت توانای له‌ درێژه‌دان به‌ سه‌ركه‌وتنه‌كان و قازانجه‌ زۆره‌كان هه‌یه‌، به‌ڵام ركه‌به‌ری كۆن و نوێ هه‌ڕه‌شه‌ له‌ زاڵبونی به‌سه‌ر بازاڕی پڕۆگرامه‌كانی لاپتۆپ له‌ جیهان ده‌كه‌ن و رووبه‌ڕووبوونه‌وه‌ی زۆری له‌ پێشه‌. بێگومان ئه‌م هه‌ڕه‌شانه‌ش بۆ كۆمپانیای مایكرۆسۆفت دیارده‌یه‌كی نوێ نییه‌، ئه‌م كۆمپانیایه‌ توانی به‌سه‌ر كۆمپانیای "IBM"ی گه‌وره‌ دروستكه‌ری كۆمپیوته‌ر له‌ جیهاندا زاڵ بێت، كه‌ ئه‌ویان ته‌نیا به‌ بازاڕی ئامێری كۆمپیوته‌ر وه‌ستاو له‌كۆتایی هه‌شتاكانیش ده‌ستی له‌ هه‌وڵی پێشبڕكێ كردنی مایكرۆسۆفت هه‌ڵگرت. دواتر چه‌ندان ركه‌به‌ری نوێ به‌دیاركه‌وتن له‌وانه‌ "سكیب، ئه‌مه‌ریكا ئۆن لاین، یاهو، لینوكس.." به‌ڵام له‌هه‌موو جارێك بێل گیتس سه‌ركردایه‌تی مایكرۆسۆفتی ده‌كردو به‌ره‌و سه‌ركه‌وتنێكی نوێی ده‌برد.
به‌م دواییه‌ بۆ ئه‌وه‌ی هێزی گوگڵ له‌به‌رامبه‌ر خۆی دووربخاته‌وه‌، هه‌وڵیدا كۆمپانیای یاهو بكرێت كه‌ به‌دووه‌م كۆمپانیای گه‌وره‌ی كارگوزاری گه‌ڕان به‌ناو ئینته‌رنێت داده‌نرێت. گوگڵیش لای خۆیه‌وه‌ كۆمه‌ڵێك كارگوزاری نوێی به‌خۆڕایی خسته‌روو، له‌وانه‌ "فایرفۆكس" كه‌ بوو به‌ ركه‌به‌رێكی ترسناكی پڕۆگرامی "ئینته‌رنێت ئێكسپلۆرر"ی مایكرۆسۆفت و توانی سه‌ریش بكه‌وێت له‌ده‌ست داگرتنی 18%ی بازاڕی پڕۆگرامه‌كانی هه‌ڵدانه‌وه‌ی لاپه‌ڕه‌كانی ئینته‌رنێت.
تاكه‌ جیاوازی له‌به‌رامبه‌ر ركه‌به‌ره‌كان كه‌ له‌داهاتوو مایكرۆسۆفت به‌خۆیه‌وه‌ ده‌بینێ بریتییه‌ له‌ ئاماده‌نه‌بوونی خودی بیڵ گیتس له‌ سه‌ركردایه‌تی كۆمپانیاكه‌، به‌ڵام مایكرۆسۆفت و گیتس هیوایان به‌و تیمه‌ هه‌یه‌ كه‌ كۆمپانیاكه‌ به‌ڕێوه‌ده‌به‌ن، له‌وانه‌ ستیف بالمری سه‌رۆكی راپه‌ڕاندنی كۆمپانیاكه‌، كه‌ دڵنیان ده‌توانێت به‌بێ ئه‌وه‌ی پێویستی به‌ بیڵ گیتسی دامه‌زرێنه‌ر هه‌بێت كاره‌كان به‌چاكی به‌ڕێوه‌به‌رێت و سه‌ركه‌وتوانه‌ش رووبه‌ڕووی ركه‌به‌ره‌كانی بێته‌وه‌.